ملف فيديو ديرة هلي / محرم 1446 هـ بصوت قحطان البديري

 

 

بـالـضـعـن ردينـه يـاديـرة هلي
بـرمح راس حسين بويه ياعلي
شفت بـيت الـبيه ربـيت امدلله
شلون حاله الفاگد اخوانه وهله
بويه ياعلي ..

الـيـوم لـلـكـوفـه وصلنه  بـس وصلنه بـغـيـر حال
روس اخوتي اعله الرماح وذابحه چفوفي الحبال

يبو زينب شوف زينب هالوكت وياها مال
اميسره بديرة ابوي امحيره اخلاف الدلال

الچنت لجل اخيالها اتطفي الضوه
وسفه فـوگ امتونها السوط التوه

وصـاحـو بـوجـهـي الشماته لاهله
شلون حاله الـفـاگـد اخوانه وهله
بويه ياعلي ..

ابنفس هالديره يـبـويـه مـن چنت اطلع وراك
الهوه ميمر يم خيالي ابرفگة اخواني وحماك

چانت اعيون الحسين اتباري خطواتي ولواك
هـسـه يمي حـسـيـن لكن عالرمح راسه هذاك

حاوطتنا بشوفها اعـيـون البشر
گمنه نـعـثـر بـالـحـيـه من النظر

الـ الـه غايه ايشوفنه و الما الـه
شلون حاله الفاگد اخوانه وهله
بويه ياعلي ..

بـويـه ودونه القصرهم عيني صدت عله البيت
عشت لحظه بذكرياتي وطاوعت گلبي وبچيت

بيا وضـع من فارگيته وهسه يمه شلون اجيت
الناس موناس التحبنه ويمه بس شامت لگيت

ماشفت نـاسـي ولا واحـد سـأل
وچـنـچ امضيعتني يـادار الأهل

صـار بـيـه الـمـاچـنـت اتـخـيـله
شلون حاله الفاگد اخوانه وهله
بويه ياعلي ..

بـالـقـصـر مـن وگفونه  و بـالإحـبـال امچتفات
يضحك ابضحكة شماته الماله غيره ولاله ذات

جـاب راس حسين يمه يگول هذا حسين مات 
يصيح چا عـبـاس وينه ويفزع الحال الخوات

ايگلب براس الحـسـيـن ابعصته
و گام يضرب عله وجهه وشفته

عـسـه تنشل ايـده ويصيبه البله
شلون حاله الفاگد اخوانه وهله
بويه ياعلي ..

چتفونه آيـات مـصـحـف مـاقرانه الـمـالـه دين
وشفنه كلشي المر علينه بمعرفه و عين اليقين

امذبحين اخواني كلهم واحنه نمشي اميسرين
ونبقه طول الـدرب نـلـهـج بـسـم رب العالمين

منكسر گـلـبـي واصد اعله الـسـمـه
انه بـنـتـك يـاعـلـي وبـت فـاطـمـه

وهذا صوت الحگ عله الباطل عله
شـلـون حاله الفاگد اخـوانـه وهله
بويه ياعلي ..

 

للشاعر : واثق العيساوي